Një person i shpallur në kërkim ndërkombëtar nga autoritetet italiane është arrestuar nga Forcat Operacionale të Policisë së Shtetit.
Në kuadër të operacionit policor të koduar “Operacionalja 3” është vënë në pranga shtetasi Pëllumb Suçi, 41 vjeç, banues në Kamëz, Tiranë. Ai akuzohet nga drejtësia italiane si pjesë e një grupi kriminal të trtafikut të Kokainës, teksa është kapur në Kamëz.
“Ky shtetas ishte i shpallur në kërkim ndërkombëtar nga autoritetet italiane, pasi Gjykata e Perugias, Itali, në vitin 2023, ka caktuar masën e sigurisë “Arrest në burg” për veprën penale “Pjesëmarrje në grup të strukturuar kriminal me qëllim trafikimin e narkotikeve”, parashikuar nga Kodi Penal Italian. Në vitin 2022, ky shtetas në bashkëpunim me disa shtetas të tjerë krijuan grup kriminal me qëllim trafikimin dhe më pas shitjen e kokainës në sasi të ndryshme.” – thuhet në njoftimin e Policisë.
Raportohet se Interpol Tirana dhe Interpol Roma po bashkëpunojnë për të kryer ekstradimin e Pëllumb Suçit drejt Italisë.
