Dy turiste belge kanë humbur rrugën pasditen e kësaj të diele gjatë eksplorimit në fshatin Kllojke të Tiranës, dhe si pasojë kishin mbetur të izoluara në terrenin e thepisur të malit.
Autoritetet bëjnë me dije se njoftimi ka mbërritur rreth orës 17:00 në komisariatin e Policisë Nr. 1 në kryeqytet, të cilët në bashkëpunim me Sektorin e Forcës së Posaçme “Shqiponja” kanë organizuar një operacion kërkim-shpëtimi.
Dy turistet belge janë shpëtuar pas disa orësh kërkime, për shkak të terrenit të vështirë dhe të thepisur dhe të largësisë së vendit nga zona që mund të përshkohet me automjete.
Shërbimet e Policisë dhe ato mbështetëse iu kanë shkuar në ndihmë turistëve, duke iu dhënë ndihmën e parë mjekësore, si dhe duke i pajisur me ushqime dhe me veshje.
