Për grupin hetimor nuk ka dyshime se ishte 51-vjeçari Ardian Gjeloshi shënjestra e atentatit të ndodhur mëngjesin e kësaj të shtunë në Gurëz të Kurbinit. Nga të shtënat me breshri automatiku, Gjeloshi mbeti i plagosur ndërsa humbi jetën ekonomisti i firmës së inerteve në pronësi të 51-vjeçarit, 70-vjeçari Selman Mihana.
Burime policore bëjnë me dije se janë disa nga pistat ku po hetohet lidhur me shkakun e krimit.
Një prej tyre lidhet me një konflikt të mundshëm në fushën e biznesit të inerteve, ku Ardian Gjeloshi operonte prej më shumë se 20 vitesh.
Nuk përjashtohet as pista e hakmarrjes. Djali i Ardian Gjeloshit ka mbetur i plagosur disa vite më parë.
Ndërsa në 2002 është shënuar një vrasje, ku të dyshuar ishin pikërisht Ardian Gjeloshi dhe i vëllai i tij.
Më 28 Nëntor 2002, në afërsi të Laçit, është qëlluar drejt një kamionçine ku udhëtonte një polici i FNSH-së bashkë me të afërm të tjerë. Sipas raportimeve mediatike të kohës, ata ktheheshin nga një ceremoni mortore në Fushë-Kuqe, kur janë përballur me breshërinë e plumbave. Si pasojë e të shtënave humbi jetën motra e efektivit dhe u plagosën familjarët e tjerë.
Mediat raportuan se i vëllai i Ardian Gjeloshit u arrestua pas krimit, që dyshohej se kishte lidhje me një konflikt që kishte një anëtar i fisit Gjeloshi me efektivin e FNSH-së.
