Nënvarianti i Covid “JN1” mund të jetë prezent edhe në Shqipëri dhe ky nënvariant, sipas virologut Andi Koraqi, ka klinikë shumë të ngjashme me gripin.
“Duke u bazuar në statistikat e vendeve fqinj ku JN1 është prezent, por nuk është dominues mund të themi që mund të jetë prezent edhe në Shqipëri. Viroologët thonë se nuk ka dallim nga klinika ndërmjet gripit dhe JN1-shit”, tha ai për RTSH.
Nisur nga sëmundshmëria shumë e ashpër, shpesh dëgjojmë edhe për mbivendosje infeksionesh virale por virologu mendon ndryshe.
“Nuk ka mbivendosje të infeksioneve, pra grip dhe Covid”- tha ai.
Imuniteti që lë vaksina anti-Covid zgjat deri në 8 muaj e për pasojë mjekët nuk përjashtojnë mundësinë e formave të rënda nga ndonjë mutacioni i mundshëm i këtij nënvarianti.
“Në një popullatë që është e pavaksinuar, por edhe në një popullatë që i ka kaluar afati i vaksinimit, virusi pëson vazhdimisht mutacione duke rënduar klinikën e të sëmurit”- tha ai.
Nënvarianti JN1 është edhe në fokus të OBSH për shkak të infektueshmërisë më të lartë se Omicron por për momentin jo dominues në Europë, veçse ne Amerikë.
