Pesë persona janë arrestuar për veprat penale “Mashtrimi”, “Falsifikimi i vulave, stampave dhe formularëve” dhe “Ndihma për kalim të paligjshëm të kufijve”. Policia njoftoi këtë të enjte se zbatoi një ditë më parë masat e sigurimit arrest me burg për të akuzuarit, ndërsa një i gjashtë është shpallur në kërkim.
Të gjashtë akuzohen nga policia si të përfshirë në skema mashtrimi të aplikimeve dhe marrjeve të vizave amerikane, me dyshimin e dhënies ndihmë për kontrabandim të qenieve njerëzore.
“Në disa raste i dyshuari kryesor R.N. (Renato Nasto) ka përfituar shuma prej 10 000 eurosh për premtimin dhe garantimin e lëshimit të vizave amerikane, për persona të ndryshëm, duke lehtësuar emigrimin e paligjshëm në Shtetet e Bashkuara. Gjithashtu, disa nga të dyshuarit kanë përdorur/paraqitur informacione dhe formularë me të dhëna të rreme, me qëllim për t’u kualifikuar për kategori të caktuara vizash amerikane”, thuhet në një njoftim të bluve.
Aksioni është kryer në bashkëpunim me autoritetet amerikane.
Sipas hetimeve, ky i fundit, falsifikonte të dhënat e formularëve në aplikimin për vizë amerikane me të dhëna të rreme me qëllim që aplikanti të kualifikohej. Këtë gjë ky i fundit e ka bërë në bashkëpunim me disa klientë të tij (katër të arrestuarit e tjerë), të cilët kanë rezultuar se në bashkupunim me Naston kanë falsifikuar formularët elektronikë për vizë amerikane duke e plotësuar me të dhëna jo reale. Renato Nasto paraqitej kur aplikantët kishin intervistën në ambasadën Amerikane për marrjen e vizës dhe i udhëzonte sesi të silleshin gjatë intervistës.
Personat e tjerë të arrestuar janë: K.P., K.K., K L. dhe Xh.S.
