Një plagosje me thikë është regjistruar mbrëmjen e kësaj të mërkure në qytetin e Vlorës. Autoritetet policore raportojnë se shtetasi G. Sh., 43 vjeç, ka plagosur me mjet prerës (thikë) shtetasin P. Z., 61 vjeç.
Ngjarja ka ndodhur rreth orës 21:00, në lagjen “10 Korriku” të qytetit bregdetar. Dyshohet se krimi ka ndodhur pas një konflikti të çastit, për motive të dobëta, në ambientet e një lokali.
Shërbimet e Policisë kanë bërë të mundur kapjen e autorit të dyshuar, shtetasin G. Sh, dhe shoqërimin e tij në Komisariatin e Vlorës, për veprime të mëtejshme hetimore.
Ndërkohë, 61-vjeçari i pëlagosur ndodhet në spitalin e Vlorës, në kujdesin e mjekëve. Gjithashtu, raportohet se në kuadër të hetimit lidhur me zbardhjen e plotë të ngjarjes, është shoqëruar në ambientet e komisariarit dhe pronari i lokalit, ku ka ndodhur ngjarja, shtetasi B. D.
Policia njofton se vijon puna për sqarimin dhe dokumentimin e plotë të rrethanave të ngjarjes.
