Nga Boldnews.al
Ish.zv.kryeministri Arben Ahmetaj deklaroi se kryeministri Edi Rama i ka ngritur pritë të trefishtë, për ta goditur dhe lincuar.
“Më ka ngritur pritë ligjore, duke ndikuar tek SPAK-u për arrestimin tim, më ka ngritur pritë politike, duke më larguar nga të gjithë funksionet në parti dhe më ka ngritur pritë mediatike, duke përdorur Top Channel për të më sulmuar mediatikisht”, deklaroi ai në një intervistë për “Çim Peka Live”.
Deklaratat tronditëse të bashkëpunëtorit më të ngushtë të Edi Ramës janë një dëshmi e fortë dhe konkrete se si kryeministri kontrollon të gjithë jetën publike në Shqipëri.
Sipas Ahmetajt, e gjithë fushata lincuese ndaj tij nisi me një fushatë agresive prej “Top Channel-it”.
“Televizioni Top Channel e mbajti fushatën kundër meje për 3 muaj me radhë. Ky televizion nuk ka mbajtur kaq gjatë Luftën e Kosovës apo Luftën e Ukrainës. Por e mbajti me mua. Natyrisht, e frymëzuar politikisht nga Edi Rama për të më goditur mua”.
Sipas ish-numrit 2 të qeverisë, Top Channel nisi sulmin e frymëzuar nga Rama, gjatë periudhës që “televizioni kishte gjyqin e pronësisë në Gjykatën e Lartë. Rama ka bërë takim me X person dy ditë para nisjes së sulmit ndaj meje”.
Kjo deklaratë e Arben Ahmetaj rikthen historinë pak kohë më parë, kur Gjykata e Lartë po shqyrtonte konfliktin mes aksionerëve të shumicës në Top Channel, Albert Sino dhe Aurel Baçi, dhe pronarëve aktualë, Vjollca Hoxha dhe fëmijët e saj.
Ndarja nga jeta në mënyrë tragjike e themeluesit të Top Channel më 23 maj të vitit 2008 rikonfiguroi aksionerët e televizionit më të madh në vend, duke futur për herë të parë në menaxhimin e televizionit Vjollca Hoxhën, bashkëshorten e Dritan Hoxhës.
Për të paktën 8 vite, znj.Hoxha e cila mori edhe detyrën e administratores së shoqërisë, bashkëpunoi duke menaxhuar çdo çështje të kompanisë me dy aksionerët e tjerë, Albert Sino dhe Aurel Baçi të cilët zotëronin 60 përqind të aksioneve.
Gjatë kësaj kohe, bashkëshortja e të ndjerit nuk ngriti asnjë pretendim mbi mënyrën e fitimit të aksioneve nga dy aksionerët e tjerë. Por, një kërkesë për vlerësimin e punës së saj si administratore ndryshoi gjithçka.
Ky do të njihet si momenti i pikënisjes së konfliktit ligjor.
Historia nisi më 26 janar 2016, kur Vjollca Hoxha dhe fëmijët e saj, të cilët të gjithë bashkë zotëronin 40 përqind të aksioneve, iu drejtuan me një kërkesë padi Gjykatës së Tiranës ku kërkonte njohjen e pronësisë edhe mbi 60 përqind të aksioneve që zotërohen nga Albert Sino e Aurel Baçi.
Bashkë me këtë kërkesë padi znj.Hoxha kërkoi edhe marrjen e masës se sigurimit duke kërkuar ngrirjen e të drejtës së vendimmarrjes për dy aksionerët kryesor të televizionit.
Gjykata e Tiranës dhe më tej ajo e Apelit të kryeqytetit, i dha të drejtë Vjollca Hoxhës e fëmijëve të saj, në disa procese me shumë pikëpyetje për mënyrën e dhënies së drejtësisë.
Çështja shkoi në Gjykatën e Lartë, e cila regjistroi padinë në vitin 2022 dhe caktoi seancën për dhënien e vendimit në janar 2023.
Duke filluar nga Shtatori 2022, televizioni “Top Channel” nisi fushatën lincuese kundër ish-zv.kryeministrit Arben Ahmetaj, “me frymëzimin e kryeministrit Edi Rama”, dhe, “në një kohë kur televizoni kishte gjyqin e pronësisë”, siç deklaroi ish-zv.kryeministri.
Ahmetaj, megjithëse nuk e tha hapur, la të kuptohet mes rreshtave se mes Ramës dhe Top Channel ishte bërë një pakt, një lloj pazari – “sulm mediatik ndaj Arben Ahmetaj në këmbim të ndikimit në procesin gjyqësor për pronësinë e Top Channel”.
Nëse vërtetë ka pasur një “pazar” të tillë, qëllimi u arrit. Gjykata e Lartë, në 18 janar 2023, rrëzoi padinë e aksionerëve të shumicës, Sino e Baçi, duke i lënë të gjithë kuotat e televizionit tek familja Hoxha.
Arben Ahmetaj duket se ka informacion të dorës së parë për këtë çështje. Ai deklaroi gjithashtu se “Ed Rama është takuar dy ditë para kësaj çështjeje me X-in (para nisjes së fushatës sulmuese ndaj tij, shën.red)”, një personazh, të cilin ai nuk preferoi ta identifikonte, por që duket se ka pasur pushtet në vendimmarrjen për çështjen e pronësisë së Top Channel.
“Boldnews.al” mësoi se vendimi për pronësinë e Top Channel në Gjykatën e Lartë është marrë nga një trupë prej tre gjyqtarësh, të cilët u ndanë 2-1 në favor të familjes Hoxha.
Një prej këtyre dy gjyqtarëve është Sokol Ngresi, i cili, vetëm pak muaj para këtij vendimi, ishte sulmuar hapur dhe ballazi në një nga emisionet e televizionit Top Channel.
Në qershor të vitit 2022, emisioni “Shqipëria Live” interviston një ish-të dënuar me 25 vjet burgim, Lulzim Caka.
Ai akuzohej se kishte tentuar të vriste në vitin 1998 në Berat komisarët Gani Malushi dhe Ilir Ngresi (të cilët, fatkeqësisht, humbën jetën disa vite më vonë në atentate të ndryshme).
“Dëshmori i Atdheut”, komisari Ilir Ngesi, është vëllai i gjyqtarit të sotëm, Sokol Ngresi.
Lulzim Caka, në atë intervistë për Top Channel në qershor 2022, akuzoi Ilir Ngresin e ndjerë se kishte pasur rol në vrasjen e nënës së tij, ngjarje e ndodhur në vitin 1999 në Seman, kur djali i saj ishte në burg.
Po ashtu, Lul Caka, në intervistën për TCH, deklaroi se “si ka mundësi që Sokol Ngresi, vëllai i një krimineli si Ilir Ngresi, të emërohet në Gjykatën e Lartë”.
Akuzat ishin shumë të rënda. Disa muaj pas kësaj interviste dhe vetëm pak kohë para se trupa gjykuese e Gjykatës së Lartë, përfshirë Sokol Ngresin, të jepte vendimin për pronësinë e Top Channel, televizioni “zhduk” pjesën e intervistës ku Lul Caka flet për vëllain e gjyqtarit.
Në një kërkim të shpejtë, rezulton që televizioni, në të gjithë platformat e tij në rrjete sociale, ka intervistën e Lul Cakës, por askund nuk gjendet pjesa ku ai përmend vëllezërit Ilir dhe Sokol Ngresi.
Duke parë faktet, rezulton se pas “zhdukjes” së pjesës problematike të intervistës së Lul Cakës, gjyqtari Sokol Ngresi dha votën e tij në favor të menaxhuesve të Top Channel, Vjollca Hoxha dhe fëmijët e saj.
Arben Ahmetaj nuk e përmendi në intervistën e tij emrin e “personi X” që ishte takuar me Ramën për çështjen e Top Channel.
Ndoshta rrethi i personave nuk është edhe aq i gjerë. Por, pavarësisht se kush ishte ky personi “X”, në çdo rast, ai është pjesë e “pazarit të pretenduar” mes Ramës dhe Top Channel, me objekt “sulm Ahmetaj, në këmbim të pronësisë”.