Reforma Zgjedhore ka futur në një debat të brendshëm opozitën, pasi pjesa më e madhe e deputetëve opozitar kërkojnë të vendosin si bashkëkryetar të komisionit Oerd Bylykbashin, por kërkesa e tyre është rrëzuar me votat e mazhorancës, e cila kërkon të mbajë si bashkëkryetar Enkelejd Alibeajn e grupit të Lulzim Bashës.
Duket se edhe Lulzim Basha nuk ka ndërmend ta lëshojë postin e bashkëkryetarit të komisionit edhe pse grupi i tij përbëhet vetëm me 7 deputetë. Këtë të premte, gjatë konferencës me gazetarët, Basha i konsideroi zhvillimet e punimeve të komisionit online si me regji të Ramës.
Deputeti i PD-së u bëri thirrje grupimeve të tjera të opozitës që të lënë alibitë dhe të bëhen pjesë e komisionit. Ai u shpreh se debati këtë javë ka qenë “ik Enkelejd, hajde Oerd”, gjë që sipas tij nuk është në interes të publikut dhe se askujt nuk i interesojnë emrat e përveçëm.
“Tani kalojmë te Reforma Zgjedhore. Teatri me regji të Edi Ramës pamundësoi pjesëmarrjen fizike në komision. Komisioni u zhvillua online dhe ka miratuar kalendarin për zhvillimin e punimeve. Thirrja ime ndaj çdokujt që nuk e ka me hile është të lërë alibitë dhe të bëhet pjesë e punës së komisionit. Prioritetet tona janë listat e hapura, barazi vote, votim dhe numërim elektronik dhe vota e diasporës. Nëse ka ide të tjera për këto çështje duhet ti dëgjojmë. Kush merr më shumë vota ai bëhet deputet. Nëse ka kryetarë partish që nuk u pëlqen kjo, unë nuk jam njëri prej tyre.
Debati dhe këtë javë ka qenë ik Enkelejd të vijë Oerdi. E kuptoni sa e mjerueshme. Nuk po arrijmë dot në debat për çështjet e qytetarëve sepse duan ta mbajnë debatin. Kujt i bëhet vonë për emrat e përveçëm? Kujt i bëhet vonë se ulet X apo Y në atë karrige. Njerëzit duan të shohin shpresë dhe për këtë PD ka paraqitur vizionin dhe platformat e veta. Ndaj nuk duhet të humbasim kohë me qaravitje dhe pelivanllëqe për të fshehur interesit personale. Në lojë janë interesa kombëtare. Qytetarët presin nga opozita të jetë serioze dhe jo grindavece për interesa personale. Përpjekja për ta future në lojë me porta për interesa personale është e destinuar të dështojë. Duke reduktuar aktivitetin parlamentar nga një zhurmë e pakutimptë që përfiton qeveria, ditën e enjte është bërë një dëm e pallogaritshëm për qindra mijëra familje shqiptare, duke kaluar në buxhetin.” – tha Lulzim Basha.
