Nga Boldnews.al
Prokuroria e Elbasanit dështoi të zbulonte nëse zyrtarët e burgut të Peqinit kanë pasur përgjegjësi në parandalimin e vrasjes me armë zjarri të të burgosurit Arben Lleshi nga i burgosuri tjetër, Sokol Mjacaj.
Kjo ngjarje, një prej më të rënda të në sistemin penitenciar shqiptar, ndodhi në 15 Dhjetor 2023.
Menjëherë pas krimit, prokuroria e Elbasanit urdhëroi, ndër të tjera, ndalimin e 12 punonjësve të burgut, përfshirë drejtorin e Institucionit të Ekzekutimit të Vendimeve Penale (IEVP) të sigurisë së lartë në Peqin, shefin e policisë, si edhe punonjës të sigurisë së burgut.
Pas këtij urdhër-ndalimi, gjykata e Elbasanit vendosi ndaj tyre masën e sigurisë “arrest me burg”, nën dyshimet se kanë kryer veprën penale të “Shpërdorimit të detyrës”.
Por, e gjithë dosja e zyrtarëve u shfry në Gjykatën e Apelit. Këtë të enjte, trupa gjykuese e shkallës së dytë urdhëroi lirimin e të gjithë zyrtarëve, duke vendosur ndaj shtatë prej tyre masën e “arrestit në shtëpi”, ndërsa për pesë të tjerë u caktua masa e “detyrimit për paraqitje”.
Me këtë vendim, Gjykata e Apelit dëshmon se dyshimet e ngritura nga Prokuroria e Elbasanit nuk justifikojnë masën ekstreme të arrestit në burg.
Madje, ky vendim dëshmon se pjesa më e madhe e zyrtarëve të arrestuar me bujë ditën e parë, duket se nuk kanë asnjë lloj përgjegjësie, përsa kohë Gjykata e Apelit ka vendosur “detyrim për paraqitje”.
Mesditën e 15 Dhjetorit të vitit të kaluar, i dënuari me burgim të përjetshëm, Sokol Mjacaj, qëlloi me pistoletë “kolegun e tij”, të burgosurin Arben Lleshi, duke e lënë të vdekur në vend.
Jo vetëm ngjarja, por edhe mënyra e realizimit të saj, përbënin një episod shumë të rëndë.
Burgu i Peqinit konsiderohet si një prej institucioneve të vuajtjes së dënimit të sigurisë së lartë dhe brenda tij gjenden disa prej eksponentëve më të rëndësishëm të krimit shqiptar.
Si rregull, ky burg duhet të ishte i monitoruar më së miri. Por, vrasja e Arben Lleshit dëshmoi se aty shumëçka ka dështuar.
Dyshimet kryesore janë që Sokol Mjacaj të jetë mbështetur nga punonjës të burgut për të siguruar armën ose, më së paku, të ketë përfituar nga neglizhenca e tyre.
Prokuroria e Elbasanit ka pasur të gjithë mekanizmat e nevojshëm për të zbuluar skenarin, si edhe rolin e përgjegjësitë e drejtuesve dhe zyrtarëve të burgut, të cilët kanë për detyrë të sigurojnë perimetrin dhe jetesën e personave të dënuar.
Por, duket se përveç “show-t” me deklarata publike të ditës së parë, prokuroria e Elbasanit nuk ka siguruar prova e fakte mbi përgjegjësinë e drejtuesve të burgut.
Dhe, kur çështja doli jashtë juridiksionit të Elbasanit, duke shkuar në një gjykatë më të lartë, në Apelin e Juridiksionit të Përgjithshëm, i gjithë rasti u shndërrua në fiasko.
Gjykata e Apelit njoftoi se ndryshoi masën e sigurimit për të gjithë zyrtarët e burgut të Peqinit, duke vendosur konkretisht: masën e “arrestit në shtëpi” për shefin e Sigurisë, Qani Muça, si edhe për punonjësit e shërbimit Ilir Balla, Fatos Pire, Genci Muça. Klement Haka, Erjon Çila dhe Indrit Dubali
Ndërkohë, gjykata zbuti akoma më shumë masat e sigurimit për pesë të tjerë, duke caktuar “detyrim për paraqitje” për drejtorin e burgut, Kamber Hoxha, ish-shefin e sigurisë, Nikolin Gjonpalaj, specialistin e sallës operative, Arben Dulellari, shefin e regjimit në burg, Vilson Shima, si edhe për policin i shërbimit, Florenc Mile.
Tashmë, në burg mbetet vetëm autori i vrasjes, Sokol Mjacaj, i dyshuar për akuzën e “vrasjes në rrethana cilësuese” dhe “armëmbajtje pa leje”.
