Më 18 Janar, gjyqtari i posaçëm Erjon Çela do të shqyrtojë kërkesën e SPAK për të marrë të pandehur ish-zv/kryeministrin Arben Ahmetaj, nën akuzën se ka shpërdoruar detyrën në privatizimin e ish-fabrikës së bukës.
Gjykata ka ftuar të dyja palët që në orën 09:00 të kësaj date të paraqiten për të përballur qëndrimet e tyre në lidhje dyshimet e ngritura nga prokuroria.
Sipas akuzës, Ahmetaj ka shitur si pronë shtetërore fabrikën e bukës, ndërkohë që shkallët e gjyqësorit i kishin njohur të drejtën e pronësisë një familje.
Me anë të reagimeve ne rrjetet sociale, nga arratia, ish-zëvendëskryeministri, i cili pritet që në seancë të përfaqësohet nga avokatët e tij, pretendon se në këtë rast ka mbrojtur interesat e shtetit dhe nuk asnjë dëm të shkaktuar si pasojë e veprimeve të tij si ministër.
Arben Ahmetaj, aktualisht në kërkim ndërkombëtar, akuzohet nga SPAK-u edhe për korrupsion, pastrim parash dhe fshehje të pasurisë, në një procedim tjetër penal të nisur si pjesë e dosjes së “Inceneratorëve”.
Ndërkohë, ende nuk ka asnjë akuzë penale ndaj biznesmenit Lirim Fezollari. Ky i fundit përfitoi aksionet e “Buka” sh.a., bazuar në një procedurë ankandi të zhvilluar nga ish-ministri Arben Ahmetaj në vitin 2015 dhe që u konstatua e paligjshme nga gjykata.
