Deputetja demokrate Albana Vokshi i bën apel SPAK të hetojë për lidhjet mes Ilir Beqjat dhe kompanisë “INTECH+”.
Vokshi ka reaguar përmes një postimi në rrjetet sociale lidhur me kontrollet e SPAK që janë kryer dje në disa kompani farmaceutike, pas dyshimeve për marrdhënieve klienteliste mes firmave dhe Ministrisë së Shëndetësisë gjatë kohës kur drejtohej nga Beqaj.
“Po te INTECH+ kur do të zbarkojë SPAK?? Jam e sigurt që do të gjejnë gjurmë jo të gruas por të vetë Beqes…me shumicë…”, shprehet deputetja.
“Ilir Beqaj është një ndër hajdutët më të mëdhenj të Qeverive Rama. Edhe pse ju hoq mandati si Hajdut, me mbështetjen dhe aprovimin e Ramës, u bë Ministër shëndetësie dhe vazhdoi të vidhte edhe më shumë. Ka vjedhur me arrogancë, pa u fshehur, sepse mendonte që Rama do ta mbronte. Ka vjedhur paratë e shëndetit të qytetarëve duke shkaktuar dëme të mëdha jo vetëm financiare por më së shumti humane. E ky është krim, ende i pandëshkuar…”, shton ajo.
Vokshi ka denoncuar më herët se ish-ministri Beqaj është pronari faktit i kompanisë “INTECH+” që ka përfituar fonde të konsiderueshme në tenderimet publike.
