Inxhinieri i ndërtimit, Shkëlqim Beqo ka folur për situatën në Lushnjë, ku një qendër tregtare ditën e djeshme u përfshi nga flakët.
Zjarri ka nisur ditën e djeshme rreth orës 14:40 të të hënës dhe ka vijuar deri në orët e para të ditës së sotme.
Inxhinieri tha se në këto raste temperaturat arrijnë deri 1500 gradë gjë që do të thotë se janë prekur strukturat e hekurit të pallatit. Sipas tij pallati duhet të vlerësohet nëse mund të qendrojë apo jo më në këmbë.
“Dëmi më i madh është i padukshmi. Temperaturat në raste zjarri të kësaj natyre arrijnë deri në 1500 gradë nëpër qoshet e banesave. Në këtë nivel të lartë temperaturash, konstruksioni betoname shkatërrohet dhe hekuri brenda tyre shtemperohet. Kjo banesë duhet të vlerësohet nëse mund të qëndrojë më në këmbë pas këtij zjarri. Rrezikohen kollonat”,-tha inxhinieri per Euronews Albania.
