Për shkak të flakëve masive që u riaktivizuan sërish në mbrëmje, mësohet se është djegur plotësisht kati i katërt i pallatit 12-katësh në Lushnjë. Bëhet fjalë për katin ku ndodhej dhe lokali i qendrës tregëtare “Metropol”.
Zjarri ka dalë jashtë kontrolli dhe mësohet se drejt vendit të ngjarjes janë nisur edhe efektivë të Forcave të Armatosura. Gjithashtu, mësohet se janë evakuar edhe banorët e pallateve pranë pallatit që u përfshi nga zjarri, pasi në një moment ka patur flakë masive.
Ndërkaq të penalizuar për shkak se nuk kanë mjetet e nevojshme zjarrfikësit po hedhin ujë nga kati i parë për në katin e katërt të qendrës që është duke u shkrumbuar. Gjithashtu, mësohet se zjarrfikësit po ndihmohen dhe me vinça për të hedhur ujë drejt zjarrit, pasi e kanë të pamundur të afrohen.
Në ndihmë të zjarrfikësve të Lushnjës kanë shkuar dhe zjarrfikës nga Fieri, Tirana, Vlora, Berati, Elbasani, Belshi, etj.
Gjatë pasdites, forcat e zjarrfikëses dhe efektivët e Policisë, evakuan të gjithë banorët nga godina, ku 39 qytetarë dhe tre zjarrfikës, sipas burimeve zyrtare, përfunduan në spital me probleme me frymëmarrjen.
