Mendimi i parë i punëve të Erion Veliajt në kryeqytet, është si të sajojë një kronikë televizive. Të pushtojë mediat vizive, bllokojë portalet me pamjen e tij dhe të futet në shtëpinë e çdo shqiptari nëpërmjet ekranit. Ia ka dalë, por duke shfrytëzuar fatkeqësinë e të tjerëve.
Veliaj është rasti tipik që me taksën e rritur të heq bukën, nëse del në rrugë për të siguruar një kafshatë, duke shitur në ndonjë qoshëz trotuari, të vë pas policinë bashkiake. Këta skifterë të Lali Erit, prenë e tyre të preferuar kanë hallexhinjtë, të moshuar apo fshatarë që tentojnë të nxjerrin pak para me disa tufa majdanoz, a ca lakra të egra të stinës. Pasi u ka mbyllur çdo mundësi për të jetuar, duke ua marrë edhe ato pak para nëpërmjet faturës së ujit të rritur, taksës së banesës, të gjelbërimit, të arsimit, e çdo lloj tjetër tarife tjetër edhe në çmimin e rritur të transportit publik, shfaqet si mëshirëmadh.
Të kthen në person në nevojë dhe më pas shfrytëzon rastin edhe në ditë Pashkësh për tu treguar zemërgjerë, Lali i dhimbshmërisë së madhe dhe ky “Robin Hut” i kohëve moderne. Konikën e sotme të përdishme televizive, nuk e realizoi në “serialin telenovelë” të mbjelljes së pemëve, por qëndroi si kuzhinier, kamarier dhe shërbyes i shtresave të varfëra. Personat në nevojë që frekuentojnë mencën sociale në Kombinat kanë festuar drekën e Pashkëve në një atmosferë të veçantë. Në kafshatën që mezi e kapërdinin, pjata e supës dhe gjellët e tjera speciale të gatuara enkas për praninë e Lali Erit, i shërbeu vetë kryebashkiaku.
“Kjo është një nga 5 qendrat tona sociale ku ne shërbejmë. Më shumë se shërbimi i një vakti çdo ditë, ky është një vend ku kalojmë kohën, ku ndërtojmë komunitet, ku pavarësisht halleve, problemeve, secili gjen një vesh që ta dëgjojë”-tha Veliaj me sytë nga kamerat. Mes atyre njerëzsish të varfër ka edhe pensionistë që detyrohen të pranojnë “supën e bashkisë” pasi ato pak para mbijetese ua ka marrë vetë bashkia me taksat e rritura. Lali i imazhit, ua grabit me ligj e dhunë skifterash ato pak para, por zgjat dorën për tu përvetësuar edhe dinjitetin. I detyron të pozojnë bukur para kamerave dhe shqiptojnë fjalën “faleminderit” kur “Erioni Madhërishëm” u vë para ushqimin. Punë e paqme djema të “piarit”, Lali doli edhe sot në televizor, për ditë Pashkësh, mes të varfërve që u mban frymën me vaftin e radhës që të ngec në grykë…
