Një grevë e papritur nga punonjësit e Getlink, kompania që administron tunelin e La Manshit çoi në mbylljen e strukturës, përmes së cilës nuk ka kaluar asnjë tren që nga mesdita e sotme. Vendimi për grevë ka sjellë kaos mes udhëtarëve në prag të festave. Të gjithë trenat e Eurostar që qarkullojnë në tunel, si dhe anijet që transportojnë makina dhe kamionë janë bllokuar deri në njoftimin e dytë,.
“Greva, e thirrur nga sindikatat franceze, çoi në ndërprerjen e plotë të shërbimit dhe mbylljen e terminaleve në Francë dhe në Mbretërinë e Bashkuar”, raportoi në një deklaratë Getlink, kompania mëmë e Eurotunelit.
Shkak për ndërprerjen e punës dhe nisjen e grevës është shpërblimi i fundvitit. Organizatat sindikale refuzuan bonusin e jashtëzakonshëm prej 1000 euro të shpallur në fund të vitit nga kompania dhe nisën grevën pasi kërkojnë trefishimin e saj.
“Ky mobilizim i fortë nuk është befasi. Për disa muaj, të gjitha organizatat sindikale së bashku kanë lajmëruar kompaninë për përkeqësimin e tmerrshëm të klimës sociale,” nënvizoi nga ana e tij Sindikata.
Njoftimi i anulimit të trenave të pasdites për në Paris, Bruksel dhe Amsterdam nga stacioni St Pancras në Londër shkaktoi panik në mesin e pasagjerëve, sipas një gazetari nga Agence France-Press. Oficerët e pritjes dhe të sigurisë në stacion, të cilët u kapën në befasi, ishin të detyruar të largonin pasagjerët që kishin kaluar tashmë kontrollet e sigurisë dhe prisnin në platformë.
