Dëmtimi i rëndë i pësuar nga David Alaba në gjurin e majtë gjatë ndeshjes kundër Villarrealit, i dha fund para kohe sezonit mbrojtësit austriak të Real Madridit.
Kapiteni i Austrisë rrezikon gjithashtu të humbasë Euro 2024 dhe ka marrë mbështetje të shumta edhe nga ish-shokët e skuadrës të Bayern Munich.
Klubi gjerman ka kontaktuar edhe me Real Madridin, duke komunikuar gatishmërinë për të ofruar një ekip të nivelit të lartë për operacionin që do t’i nënshtrohet lojtarit.
“Unë u përpoqa të kontaktoja David Alaba, por për fat të keq nuk arrita. Te Bayern u vumë në lëvizje për të siguruar që ai të operohej në Innsbruck nga një mjek tek i cili kemi besim të madh”, shpjegoi presidenti i nderit Uli Hoeness duke folur në ‘Servus TV.
Kirurgu në fjalë, siç raporton ‘Kleine Zeitung’, mund të jetë Christian Fink, i cilësuar si “një nga kirurgët më të mirë të gjurit në histori”, i cili tashmë ka operuar në të kaluarën si Leroy Sane dhe Manuel Neuer.
