Prokuroria e Posaçme njoftoi të shtunën përfundimin e hetimeve dhe dërgimin për gjykim të 21 anëtarëve të një grupi të strukturuar kriminal me veprimtari në fushën e trafikut dhe shitjes së lëndëve narkotike, si dhe të pastrimit të parave. Në njoftim thuhet se hetimi është kryer në bashkëpunim me Prokurorinë e Bergamos në Itali, prej nga është provuar tregtimi i një sasie prej më shumë se 120 kilogramë kokainë, 15 kilogramë heroinë si dhe 129 kilogramë marijuanë e 92 kilogramë hashash, të sekuestruara në Itali në disa episode të ndryshme.
Veprimtaria grupit rezulton të jetë zhvilluar prej vitit 2015 e në vijim, kryesisht në qytetin e Durrësit në Shqipëri, si dhe në disa qytete të Italisë, si në Bergamo, Breshia, Milano dhe Torino.
Si krijues dhe drejtues të organizatës akuzohen të pandehurit Gernard Beu, Emirjan Beu dhe Braniol Liço, ndërsa si pjesëmarrës, janë identifikuar 18 persona të tjerë, konkretisht të pandehurit Florid Vukaj, Lulzim Selimi, Dhimitër Nina, Dorian Beu, Syrjan Tola, Ramazan Grada, Igli Lala, Saimir Prenga, Rexhep Dallupi, Enkeleda Bakalli, Gjergji Luli, Alfred Luli, Ilir Duro, Françesko Çeçi, Lorik Prengaj, Gjergj Zefi, Renato Zefi dhe Eledjo Dedej.
Me kërkesë të SPAK, gjykata respektime ka vendosur edhe masën e sigurimit “Sekuestro preventive” ndaj pasurive të luajtshme dhe të paluajtshme në zotërim direkt dhe indirekt të drejtuesve të grupit kriminal, të pandehurve Braniol Liço, Gernard Beu dhe Emirjan Beu. Në njoftim thuhet se janë sekuestruar tre shoqëri tregtare dhe asetet e tyre, katër aktivitete të tjera tregtare, anije peshkimi, automjete, pesë njësi shërbimi; një apartament dhe një garazh.
Sipas prokurorisë, pasuritë kapin shumën e 1 milion eurove dhe sekuestrimi i tyre është kryer me arsyetimin se vlera i korrespondon asaj të produkteve të veprës penale, të cilën të pandehurit kanë përfituar nga kryerja e aktivitetit kriminal.
