Kategoria Superiore luan tre sfidat e fundit të javës së 17-ë, me gjashtë skuadra që zbresin në fushë për të marrë tri pikët për objektivat.
Në orën 13:30 spikat “klasikja” e futbollit shqiptar, Tirana-Vllaznia, që do të luhet në “Selman Stërmasi”. Bardheblutë vijnë nga tre ndeshje radhazi pa fitore dhe do të kërkojnë të bëjnë çmos për të shkuar sërish te tri pikët.
Nga ana tjetër, kuqeblutë kanë marrë gjashtë pikë në tre ndeshjet e fundit dhe një fitore tjetër do t’i ngjiste ata në zonën e “Final 4”.
Po në këtë orë luhet dhe takimi Erzeni-Teuta në Rrogozhinë. Të dyja skuadrat mbyllin tabelën dhe do të kërkojnë me çdo kusht tri pikët për të dalë nga zona e ftohtë e mbijetesës.
Në orën 17:00, Skënderbeu pret në Korçë skuadrën e Laçit. Ekipi i Gvozdenoviç vazhdon të bëjë mirë këtë sezon dhe kërkon që të ruajë pozicionin që ka në “Final 4”. Nga ana tjetër, kurbinasit duan që të dalin me patjetër nga zona e ftohtë e mbijetesës dhe në Korçë do të shkojnë vetëm për fitore.
