Policia e Tiranës ka kërkuar ndihmën e qytetarëve për kapjen e autorit të atentatit të regjistruar mëngjesin e djeshëm në zonën e “Don Boskos’ ndaj 42-vjeçarit Rudolf Zefi me origjinë nga Puka.
Autoritetet bëjnë me dije se autori është shtetasi Andrea Bregasi, teksa Policia ka publikuar foton e tij dhe jep 5000 euro shpërblim për çdo informacion të vlefshëm që do të çojë në kapjen e tij.
Burime bëjnë me dije se Andrea Bregasi kishte vetëm 7 muaj që kishte dalë nga burgu. I kapur nga kamerat e sigurisë, ai shfaqej i pamaskuar dhe duke ecur në këmbë në momentin kur qëlloi me pistoletë disa herë në drejtim të automjetit “Benz” që drejtohej nga Rudolf Zefi, fatmirësisht pa lëndime.
Njoftimi:
Lidhur me ngjarjen e ndodhur ditën e djeshme, më datë 14.12.2023, rreth orës 06:50, në rrugën “Don Bosko”, ku një person që lëvizte i vetëm në këmbë, ka qëlluar disa herë me armë zjarri pistoletë në drejtim të automjetit “Benz”, me drejtues shtetasin R. Z., dhe pasagjerë shtetasit R. Z., dhe R. Z., ju informojmë se:
Strukturat e DVP Tiranë, Sektori për Hetimin e Krimeve të Rënda, në bashkëpunim me Komisariatin e Policisë Nr. 3, pas kryerjes së veprimeve të thelluara hetimore, dhe informacioneve të marra nga inteligjenca policore, bënë të mundur identifikimin dhe shpalljen në kërkim të autorit të dyshuar të ngjarjes, shtetasi Andrea Bregasi, i ditëlindjes 09.12.1992, banues në Tiranë.
DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e autorit.
Drejtoria Vendore e Policisë Tiranë vendos në dispozicion të qytetarëve, numrin e telefonit 0694111546, duke garantuar anonimatin e plotë të çdo telefonuesi.
