Policia e Tiranës ka arrestuar dy administratorë “call center-i” dhe ka proceduar pernalisht 7 operatorët, pasi mashtronin të huaj përmes telefonit për investim në bursa fiktive.
Në kuadër të operacionit policor të koduar “Trading” janë vënë në pranga shtetasit Saimir Blini, 33 vjeç, Martin Baçi, 25 vjeç, të dy banues në Tiranë.
“Shtetasit Saimir Blini dhe Martin Baçi kishin në administrim një call center në Rrugën e Barrikadave, në të cilin ishin të punësuar 7 operatorë, të cilët, së bashku me administratorët, telefononin shtetas të huaj, iu prezantoheshin si agjentë shitjesh dhe përmes mashtrimit, i bindnin ata që të investonin në bursën fiktive Forex.” – thuhet në njoftimin e bluve të kryeqytetit.
Gjatë operacionit, uniformat blu kanë sekuestruar në cilësinë e provës materiale dy njësi kompjuterike, një USB, dhe celularë. Materialet procedurale i kaluan Prokurorisë së Tiranës për veprime të mëtejshme.
