Shkëlzen Berisha, djali i ish-kryeministrit Sali Berisha, ka reaguar pasi nuk u paraqit sot në GJKKO për të dëshmuar në lidhje me dosjen e Gërdecit, teksa SPAK pretendoi se ai nuk banon në adresën e deklaruar dhe në këtë mënyrë nuk e gjejnë për t’i dorëzuar fletë-thirrjen.
Përmes një postimi në rrjetet sociale, Shkëlzen Berisha hedh poshtë të gjitha pretendimet e SPAK, teksa i konsideron si në funksion të qëllimeve politike e mediatike të Edi Ramës.
Ai shkruan se në dëshminë e dhënë para SPAK ka depozituar adresën e saktë si dhe numrin e telefonit dhe se në asnjë adresë të tij fizike apo elektronike nuk ka mbërritur asnjë ftesë për t’u paraqitur për të dëshmuar. Shkëlzen Berisha konfirmon se mbetet i hapur për t’u paraqitur në GJKKO konform ligjit, pasi të marrë ftesën.
“Në lidhje me disa raportime mediatike për “mos paraqitjen” time si dëshmitar në gjykatë, më duhet të sqaroj se në asnjë adresë timen fizike apo elektronike nuk ka mbërritur asnjë ftesë për t’u paraqitur për të dëshmuar! Pretendimet e SPAK, që janë qartaz në funksion të qëllimeve politike e mediatike të Edi Ramës, bien poshtë, si nga njoftimet e mëparshme që janë ekzekutuar me sukses, ashtu dhe nga fakti që personalisht në dëshminë e dhënë para SPAK kam depozituar adresën e SAKTË si dhe nr e telefonit! Mbetem i hapur për t’u paraqitur konform ligjit me të marrë ftesën!” – shkruan Shkëzen Berisha.
