Atentati ndaj biznesmenit Lulzim Masha e ka porositur i shumëkërkuari i drejtësisë, Eldi Dizdari.
Kështu ka deklaruar Henrik Hoxha në seancë paraprake për personat e arrestuar në kuadër të operacionit “Plumbi i Artë” në GJKKO, ku nëpërmjet avokatëve të tij, ai ka kërkuar që ti rikthehet statusi i bashkëpunëtorit të drejtësisë.
Sipas Henrik Hoxhës, Nuredin Dumani i kishte thënë se duhej të vritje djali i Lulëzim Mashës, pasi mashtronte njerëzit dhe u merrte para. Duke qenë se djali fshihej në Maqedoni “porositësit” kanë tentuar të vrasin babanë e tij, ndërsa për atentatin ishin ofruar 100 mijë euro. Më herët ai kishte deklaruar se kishte pajtuar Skerdi Tasin për të vrarë biznesmenin.
Deklarata e sotme në gjyq e Henrik Hoxhës shihet me rezerva pasi më parë kishte thënë se nuk kishte dijeni për llogari të kujt kishte marrë Nuredin Dumani këtë porosi. Ndërkohë, deklarata e Henrik Hoxhës bie ndesh dhe me deklaratën e Dumanit, i cili ka dëshmuar se porositësi i kësaj ngjarje ka qenë Aleksandër Baho, i njohur me nofkën “Sakati”.
Si Aleksandër Baho po ashtu edhe Eldi Dizdari dyshohet se qëndrojnë në Dubai. Atentati ndaj biznesmenit Lulzim Masha, administrator i një shkolle private në Tiranë, u regjistrua më 18 Janar të vitit të kaluar në zonën e Liqenit të Thatë në kryeqytet. Një person i paidentifikuar qëlloi me armë zjarri pistoletë në drejtim të mjetit tip Benz të cilin e drejtonte Masha, i cili udhëtonte i vetëm. Si pasojë e të shtënave nuk pati persona të lënduar.
Lidhur me atentatin ndaj Lulzim Mashës, SPAK ka marrë të pandehur Henrik Hoxhajn, Skerdi Tasen, Nuredin Dumanin dhe Suel Çelën.
Henrik Hoxha u bë bashkëpunëtor i drejtësisë në prill të vitit të kaluar, por me kërkesë të prokurores Doloreza Musabelliu, iu hoq në muajin korrik. Ai ka treguar disa ngjarje për të cilën ai vet ka marrë pjesë me Nuredin Dumanin. Por nga analiza e faktve disa qëndrime të tij të treguar për disa atentate të kryera në bashkëpunim me Dumanin nuk korrespondojnë me ato të këtij të fundit, gjë e cila ka bërë që të prishet marrëveshja e bashkëpunimit me Prokurorinë.
Henrik Hoxhaj ka pretenduar sot në gjykatë se ka qënë bashkëpuntori më i drejte pasi ka treguar ngjarje dhe detajë nga krimet më shumë se çdo bashkëpuntor tjeter. Me heqjen e statusit ai tashmë nuk përfiton nga ulja e dënimit.
Henrik Hoxhaj njihet si krahu i djathtë i Nuredin Dumanit, ku në bashkëpunim me njëri-tjetrin e persona të tjerë, kryen disa vrasje, më të rëndat ajo e vëllezërve Besmir e Viktor Haxhia, si dhe të Dorian Shkozës Anxhelo Avdiajt.
