Policia kufitare e Rinasit ka goditur dy raste të kontrabandës së mallrave dhe një rast të mosdeklarimit të parave.
Autoritetet policore bëjnë me dije se për dy rastet e kontrabandës janë arrestuar në dy shtetase dhe janë proceduar në gjendje të lirë dy të tjera. Ndërsa për rastin e mosdeklarimit të parave është proceduar penalisht një shtetas gjerman.
Më konkretisht:
- Është arrestuar shtetasja E. K., 26 vjeçe dhe ka nisur procedimi në gjendje të lirë për shtetasen H. K., 24 vjeçe, të dyja banuese në Tiranë, pasi në hyrje të RSh-së, në valixhet e tyre, shërbimet e Policisë kanë gjetur veshje për femra, të markave të ndryshme, që nuk ishin deklaruar në doganë, siç përcaktohet me ligj;
- Është arrestuar shtetasja V. M., 61 vjeçe dhe ka nisur procedimi në gjendje të lirë për shtetasen M. B., 52 vjeçe, të dyja banuese në Tiranë, pasi në hyrje të RSh-së, në valixhet e tyre, shërbimet e Policisë kanë gjetur veshje për femra, të markave të ndryshme, që nuk i kishin deklaruar në doganë, siç përcaktohet me ligj;
- Janë referuar materialet në Prokurori ku ka nisur procedimi në gjendje të lirë për shtetasin gjerman N. Z., 44 vjeç, pasi në dalje në RSh-së, gjatë kontrollit fizik dhe kontrollit në çantë, shërbimet e Policisë i kanë gjetur 30 000 euro që nuk i kishte deklaruar në doganë. Shuma e parave u sekuestrua në cilësinë e provës materiale.
Uniformat blu kanë sekuestruar veshjet e markave të ndryshme me vlerë të konsiderueshme dhe shumën 30 000 euro. Materialet procedurale i kaluan Prokurorisë së Tiranës për veprime të mëtejshme.
