Ardit Deliu pranon se pikët janë reale për Tiranën. Sipas tij, renditja reflekton gjendjen e skuadrës, por tani është koha që Tirana të ndryshojë.
Në një intervistë për “Panorama Sport”, Deliu foli për sfidën me Laçin, çfarë i mungon Tiranës këtë sezon dhe ku do t’i shohim bardheblutë në fund të kampionatit. Lojtari foli për situatën te Tirana dhe pranoi se ekipi tani e ka marrë veten.
Kavajasi është lojtari më i rëndësishëm i Tiranës në mesfushë. Gjatë verës me golin e tij u dhuroi kualifikimin bardhebluve në Konferencë Ligë. Ardit Deliu ka koleksionuar këtë sezon 918 minuta në 11 takime. Lojtari ka shënuar një gol në Superiore.
Në Europë, Deliu luajti katër sfida, tundi rrjetën një herë dhe ishte në fushë 178 minuta.
Skuadra e Tiranës në renditje ka pozicionin dhe pikët reale ose ato që meriton në fund të ditës?
Mund të them që me oshilacionet që kemi pasur, me ulje-ngritjet, mendoj që janë reale. Pse jo, s’kemi pse ta gënjejmë veten. Nuk është se kemi ecur mirë. Thjesht nga tani e tutje duhet të tregojmë vazhdimësi në çdo takim.
Tirana në fund të sezonit mund të fitojë të dy trofetë e këtij sezoni futbollistik?
Pa diskutim. Edhe me formulën që kemi, ndonëse jemi të shkëputur me pikë, kemi shumë mundësi. Pikët zerohen dhe ekziston mundësia që të fitojmë si Kupën dhe kampionatin.
