Në ngjarjen e djeshme në Fier ku mbeti i vdekur 41-vjeçari Elton Javori pati shkëmbim zjarri. Ky është konkluzioni i hetimeve paraprake të grupit hetimor, që ka arritur të identifikojë dhe autorin e dytë të vrasjes së Javorit.
Ai është Kreshnik Gashi, vëllai i Agim Gashit, emri i të cilit publikua në media pak pas krimit si një nga dy autorët e dyshuar të vrasjes.
Dinamika
Atentati u shënua rreth orës 11 të së enjtes në lagjen “16 Prilli”, pranë banesës ku jetonte 41-vjeçari.
Pamje nga vendngjarja
Burime zyrtare nga policia e Fierit thanë këtë të premte se nga një automjeti tip “Benz” është qëlluar me armë zjarri drejt automjetit tip “Porche” që drejtohej nga Elton Javori. Qitja është kryer nga krahu i pasagjerit.
Pas këtij veprimi, shtojnë të njëjtat burime, Javori ka qëlluar disa herë me pistoletë në drejtim të automjetit tip “Benz”.
Si pasojë e shkëmbimit të zjarrit, 41-vjeçari ka mbetur i vrarë.
Autorët dy vëllezër
Nga hetimet rezultoi se autorët që udhëtonin me automjetin tip “Benz” janë vëllezërit Agim Gashi, 35 vjeç dhe Kreshnik Gashi, 33 vjeç, të cilët janë shpallur në kërkim.
Ndaj tyre janë ngritur akuzat për veprat penale “Vrasje me paramendim” e kryer në bashkëpunim dhe “Prodhimi dhe mbajtja pa leje e armëve dhe municionit luftarak”.
Nga këqyrja e vendit të ngjarjes, në afërsi të automjetin tip “Porche”, u gjet nga blutë 1 armë zjarri pistoletë me numër trupi të paidentifikuar e cila u sekuestrua në cilësinë e provës materiale.
Motivi i kësaj ngjarjeje kriminale, sipas bluve, dyshohet një konflikt i nisur disa kohë më parë midis Agim Gashit dhe Elton Javorit “për motive të dobëta”.
Momenti i vrasjes filmuar nga një kamer sigurie
