Gjykata e Apelit ka shpallur vendimin për Mexhit Picarin dhe të bijën Dhurata Saliaj lidhur me vrasjen e Kudret Saliajt.
Gjykata ka vendosur dënimin me burgim te përjetshëm për Mexhit Picarin, ndërsa e bija, Dhurata Saliaj, u dënua me 4 vjet e 6 muaj burgim.
Mexhit Picari akuzohet për vrasjen e ish-dhëndrit, ndërsa e bija për krijim të kushteve për të kryer vrasjen. Për Saliajn, Apeli rrëzoi këtë të enjte akuzën për bashkëpunim në vrasje. Në shkallën e parë, ajo ishte dënuar me 30 vite burg, ndërsa prokuroria kërkoi 35 vite burgim.
Ngjarja ndodhi në vitin 2021.
Çifti Dhurata e Kudret Saliaj, ishin në proces divorci, kur ndodhi krimi i rëndë në muajin qershor të 2021.
Viktima, Kudret Saliaj mbërriti në një lokal pranë gjykatës së Tiranës, ku priste të zhvillohej seanca e radhës për divorcin dhe ndodhej në praninë e avokatit të tij si dhe një punonjëseje sociale.
Vjehrri i tij Mexhit Picari pasi e vëzhgoi bashkë me të bijën Dhurata Saliaj, e qëlloi për vdekje dhëndrin, teksa në ngjarje mbeti i plagosur edhe avokati Adriatik Cami.
