Pesë ditë nga vrasja në Lezhë, një tjetër person është qëlluar për vdekje me armë zjarri këtë të enjte. Ngjarja ka ndodhur në lagjen “16 prilli” në Fier, ndërsa viktima është Elton Javori, 41 vjeç.
Javori dyshohet se është qëlluar me armë zjarri rreth orës 11:00, teksa ishte duke lëvizur me automjet. 41-vjeçari u transportua në spitalin rajonal, por nuk mundi të mbijetojë.
Një nga autorët e dyshuar është identifikuar nga blutë. Ndërkaq, burime pranë grupit hetimor thanë se ai është Agim Gashi, i cili ka pasur lidhje krushqie me viktimën. Dyshohet se autori dhe viktima janë përfshirë në një sherr disa ditë më parë.
Përveç Gashit, dyshohet se një tjetër person e ka ndihmuar. Vrasja mësohet se është filmuar nga kamerat e sgiurisë të banesave përgjatë rrugës ku u qëllua për vdekje Javori.
Dyshohet se qitja drejt makinës së viktimës është realizuar nga një tjetër automjet në lëvizje.
Autorët mendohet se kanë përdorur një automjet tip “Benz” me ngjyrë të zezë në krim: nga i cili është qëlluar drejt 41-vjeçarit si dhe për tu larguar nga vendngjarja.
“Janë ngritur pika kontrolli në çdo aks rrugor, si dhe vijon intensivisht krehja e zonës. Ndërkaq, grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes dhe kapjen e autorit”, thuhet në një njoftim paraprak të policisë së Fierit.
Një prej banorëve tha për gazetarët se 41-vjeçari banonte pranë vendit ku u ekzekutua.
“Ka qenë djalë i mrekullueshëm, i edukuar dhe i sjellshëm. Ka babanë e nënën këtu, vëllezërit i ka në Gjermani. Nga erdhi kjo, Zoti e di. Sa dola nga shtëpia, u futa të pija kafe, dola me vrap”, u shpreh ai.
