Anëtari i Këshillit Bashkiak të Tiranës, Ilir Alimehmeti, për parashikimin e Bashkisë Tiranë për ta mbyllur vitin 2023 me 140 milionë euro të ardhura vetëm nga taksat dhe tarifat thotë se një pjesë e vogël e parave shkon për shërbime e një pjesë e madhe vidhen.
Në emisionin “MCN Economy”, Alimehmeti deklaroi se një pjesë e madhe e këtyre parave shkojnë në abuzime çmimesh nga më të ndryshmet, ku tha se që të paguhet një pishë 6 apo 10 milionë lekë të vjetra, kuptohet se nuk janë shifra reale.
“Këto janë vjedhje dhe abuzim direkt dhe abuzim indirekt nëpërmjet fryrjes së çmimeve. Apo për inceneratorin e Tiranës që këto lekë shkojnë kot, pasi asnjë shërbim nuk ofrohet. Investimet që bëhen në shkolla dhe të krahasoni shkollat që financon Bashkimi Europian dhe ato që financohen nga Bashkia Tiranë, do vihen re diferenca shumë të larta. Kemi një vjedhje direkte thjesht marrje parash dhe e dyta, vjedhje nëpërmjet fryrjes së çmimeve. Ka një fond shumë të madh Bashkia Tiranë, merr 1/3 e totalit të buxhetit të të gjitha bashkive në vend, por aty kemi një mungesë shumë të madh informacioni. Kjo është bashkia e mungesës së transparencës dhe e abuzimit total. Këto janë para që merren nga ne, por që nuk shkojnë në shërbim të qytetarëve.”
Sa i takon taksës arsimore, Alimehmeti deklaroi se vendimi i Këshillit Bashkiak i vitit 2015 vendosi taksën e përkohshme arsimore, e cila nuk mund të jetë më shumë se tre vjet. Por ai nënvizoi se në vitin 2022 taksën e miratuan sërish dhe e zgjatën dhe tre vjet të tjera dhe se këto dhurata i bëjmë gjithnjë për vit të ri.
“150 mijë familje kanë paguar dhjetëfish më shumë se norma. Këtë Vendim të Këshillit Bashkiak e ka vetëm bashkia Durrës për bizneset, ndërsa Tirana e ka dhe për familjarët dhe kjo ndodh se këtu është hajdutëria më e madhe. Kryeqyteti nuk duhet të jetë vetëm fjetore, ku bëhen vetëm ndërtime, por duhen dhe investime në mënyrë që fëmijët të mos jenë me dy turne. E keni parë që piku i trafikut është në orët kur fillon shkolla, se prindërit i çojnë fëmijët me makinë në shkolla. Pse i çojnë me makinë? Se nuk kanë shkolla afër. Zona e Astirit është sa qyteti i Lushnjës, dhe aty nuk ka kopsht, çerdhe dhe shkollë. Toka është aty dhe shkolla nuk bëhet kurrë.”
Alimehmeti tha se ndotja në Tiranë shkaktohet vetëm nga trafiku dhe nga ndërtimet dhe se nuk ka arsye tjetër për ndotjen. Ai shtoi se gjithashtu nuk bëhet matja e nivelit të ndotjes në Bashkinë Tiranë, dhe se raporti i Kontrollit të Lartë të Shtetit evidentoi se nuk ka as fonde dhe as hapësira për të mbjellë 1 milion pemë.
“Nuk ka as hapësirë dhe as fonde, 0.46 metër katrorë është norma aktuale e hapësirës së gjelbër në Tiranë, ndërsa norma duhet të jetë 9 metër katrorë për çdo person.”
