Një sasi eksplozivi, një automjet i modifikuar, 5 motoçikleta, targa të dyshuara të vjedhura dhe sende të tjera janë sekuestruar në Fushë-Kuqe. Lënda plasëse dhe mjetet u gjetën në një banesë dhe pranë saj, pronari i së cilës është arrestuar. Policia njoftoi këtë të martë se banesa shërbente si bazë “ku furnizoheshin me mjete, grupe kriminale, me qëllim kryerjen e krimeve të rënda kundër personit”.
Aksioni
Aksioni erdhi me mbështetjen dhe informacionet e siguruara nga inteligjenca policore, thanë burime zyrtare nga blutë.
“Në fshatin Gorre, njësia administrative Fushë Kuqe, shërbimet e Policisë Kriminale të Lezhës dhe ato të FNSH Shkodër, kanë kryer kontrolle në një banesë të vjetër në pronësi të shtetasit A.L.. Nga kontrollet në brendësi dhe përreth saj, janë gjetur dhe sekuestruar në cilësinë e provës materiale: 1 automjet tip ‘Mazda’, me ndërhyrje dhe me dëmtime në strukturën e tij, për të pamundësuar përcaktimin e të dhënave të automjetit; 5 motomjete me fuqi të lartë motorike, të dyshuar të vjedhur; 4 palë targa, për automjete dhe motomjete, të dyshuara të vjedhura në qytete të ndryshme të Shqipërisë dhe në Kosovë; 400 gramë lëndë e dyshuar eksplozive, me fitil zjarrpërcjellës, e gatshme për shpërthim; kapuçë si maska, doreza dhe skafanda motomjetesh, veshje për kamuflazh, si dhe një sërë sendesh të tjera që do t’i shërbenin kryerjes së ngjarjeve të rënda kriminale”, njoftoi policia.
Pronari i banesës A.L., 40 vjeç u arrestua për veprat penale “Sigurimi i kushteve dhe mjeteve për të kryer vrasje”, “Trafikim i mjeteve motorike”, “Mbajtja pa leje dhe prodhimi i armëve, armëve shpërthyese dhe municionit” dhe “Vjedhja”.
Hetimet vijojnë për të zbardhur se për llogari të të cilëve persona posedoheshin këto mjete/sende dhe që ishin bashkëpunëtorë në këtë veprimtari kriminale, shtuan të njëjtat burime. Hetimet e mëtejshme do të kryhen nga prokuroria e Lezhës.
