Policia e Kosovës ka konfirmuar se gjatë aksionit ka vrarë një prej të dyshuarve të grabitjes së armatosur që ndodhi një ditë më parë në një argjendari në Suharekë.
Gjithashtu, katër persona janë arrestuar në lidhje me ngjarjen, ndërsa një person tjetër ende kërkohet nga autoritetet. Gjatë këtij operacioni të ndërmarë nga policia, një nga të dyshuarit ka hapur zjarr ndaj zyrtarëve policorë, duke shkaktuar plagosjen e njërit prej tyre. Autoritetet kanë konfirmuar se situata ka qenë e tensionuar, dhe forcat e policisë kanë reaguar duke mbrojtur veten dhe të tjerët.
Policia po vazhdon hetimet për të sqaruar plotësisht ngjarjen dhe identifikuar të gjithë pjesëmarrësit në grabitje dhe konfrontimin me autoritetet.
“Zyrtarët policorë në vetëmbrojtje janë detyruar të përdorin forcën proporcionale, duke arritur të neutralizojnë një të dyshuar, përderisa katër të dyshuar të tjerë janë arrestuar. Deri më tani numri i të arrestuarve ka shkuar në shtatë persona, një i neutralizuar dhe një tjetër ende gjendet në kërkim policor”, ka njoftuar policia.
