Dy persona janë arrestuar nga Policia e Vlorës, pasi u janë gjetur armë zjarri në automjet. Në kuadër të operacionit policor të koduar “Strike 3”, në pranga janë vënë shtetasit Jurgen Gurthi 27 vjeç dhe Egent Alku, 45 vjeç, të dy banues në Tiranë.
Autoritetet policore bëjnë me dije se këta dy shtetas po lëviznin të armatosur me automjetin tip “Volkswagen”, në rrugën “Murat Tërbaçi” të qytetit bregdetar. Uniformat blu, gjatë kontrollittë automjetit kanë gjetur një armë zjarri pistoletë me municion luftarak, teksa Jurgen Gurthi ishte drejtues i automjetit, ndërsa Egent Alku pasagjer.
Nga hetimet ka rezultuar se Egent Alku është me precedent penal në fushën e krimeve kundër jetës. Arma e zjarrit dhe municioni luftarak, së bashku me automjetin dhe dy celularë janë sekuestruar në cilësinë e provës materiale.
Materialet procedurale i kaluan Prokurorisë së Vlorës për veprime të mëtejshme.
