Gazetari Basir Çollaku është shprehur se te dosja e SPAK për grupin kriminal të Ervin Matës, Bujar Gërmizit dhe djalit të Erzen Breçani, Eralbi Breçani ka edhe një emër ministri që komunikon me një prej të arrestuarve.
Komentet Çollaku i bëri në “Euronews Albania”, ku tha se kryeministri Edi Rama, ministri i Brendshëm, Taulant Balla dhe ai i Drejtësisë, Ulsi Manja, duhet të tregonin nëse të afërm të tyre e kanë përdorur aplikacionin SKY ECC ose jo.
“Të hetohet korrupsioni politik që gjendet këtu. Bashkëpunimi i politikanëve për zgjedhjet e investimet me grupet kriminale. Edhe te dosja e fundit e Matës, pasi Breçani është periferik në këtë histori, ka një emër ministri që komunikon me një të arrestuar. Unë nuk e kam parë vendimin prej 104 faqesh të Gjykatës së Posaçme, pra në vendimin e Gjykatës mungon. Ka komunikuar me njërin nga të arrestuarit. Nuk është i vetmi rast. Një ide e ministrit Balla, që thoshte se të gjithë nga e hëna, kush ka këto aplikacione të largohet, çka ishte një propagandë.
Nuk është njeri i besueshëm ministri i Brendshëm për të pasur në dorë këtë histori. Unë do të thoja që kryeministri Rama, ministri i Brendshëm dhe ai i drejtësisë, duhet të thoshin nëse kanë pasur të afërm që kanë pasur telefona me këta aplikacione”, është shprehur Çollaku.
