Arrestimet e bëra së fundmi nga policia italiane, midis Foggia-s dhe Torino-s, kanë konfirmuar dy qëndrime mbi xhihadizmin në Itali: vijon ende aktiviteti i rekrutimit të individëve nga Shteti Islamik si edhe mungon organizimi i strukturuar i tyre, si në vendet e tjera europiane.
“Il Foglio”, raporton se këto qëndrime i ka konfirmuar edhe Ministri i Brendshëm, Marco Minniti, i cili në një intervistë të dhënë shpjegonte sesi “pamja e kërcënimit të ISIS mbetet rrënjësisht e pandryshuar”.
Tendenca e dytë është se ekziston një lidhje gjithnjë e më e qartë midis Italisë dhe rrjeteve terroriste aktive në Ballkan.
Të martën, policia në Foggia arrestoi një imam 59-vjeçar egjiptian, i cili po predikonte në një xhami abuzive dhe u mësonte fëmijëve se “duhet t’i çajmë kokat e jo besimtarëve dhe të pimë gjakun e tyre”.
Predikuesi, Mohy Abdel Rahman, i detyroi fëmijët të betoheshin për besnikëri ndaj Kalifatit dhe u mësonte atyre gjuhën arabe me ndihmën e vizatimeve që përshkruanin granata dore dhe makina të armatosura.
Rahman kishte lidhje me Eli Bombataliev, një çeçen që kishte luftuar në Siri në vitin 2014-të, të cilin Imami kishte pritur në shtëpi për dy vjet.
Maria Kachmazova, bashkëshortja e Bombataliev, u dëbua së bashku me vëllezërit shqiptarë Lusien dhe Orkid Mustaqui, të cilët gjithashtu ishin të radikalizuar.
Pista e Ballkanit rikthehet edhe në arrestimet e bëra nga Digos, i cili ndali për të dytën herë një 23 vjeçar me origjinë marokene lindur në Cirie, afër Torinos.
Elmahdi Halili ishte arrestuar në qershor të vitit 2015, kur në hetimin “Balkan Connection”, prokuroria në Brescia kishte ndalur edhe Elvis Alban Elezi, dy shqiptarë të dyshuar se kanë rekrutuar Anas el Abboudi, një maroken banor në Vobarno dhe më pas u nisën për të luftuar në Siri.
“Lidhja midis xhihadizmit ballkanik dhe Italisë daton nga lufta në ish-Jugosllavi. Që atëherë vendi ynë ka qenë pika e natyrshme logjistike e rrjeteve fondamentaliste të Ballkanit”, u shpreh Francesco Marone.
“Me kalifatin dhe paqëndrueshmërinë e disa vendeve, si Kosova, Shqipëria, Maqedonia dhe Mali i Zi, këto lidhje janë thelluar”.
Rasti më i spikatur ishte ai i Maria Giulia Sergio, e cili u largua në vitin 2014-të në Siri dhe u martua me Aldo Kobuzi, një mbështetës shqiptar të Kalifatit.
Ndër shumë raste precedentë që konfirmojnë lidhjet e përbashkëta mes Ballkanit me Italinë, ekziston edhe një prirje e re, e cila thekson rekrutimin brenda familjes të cilësuar si një “vazhdimësi brengosëse e gjeneratave”.
