Deputeti Ervin Salianji ka reaguar pas aksionit të SPAK ku përfunduan në pranga disa drejtues të lartë të policisë.
Në një postim në rrjetin social, Salianji konstaton se këto arrestime konfirmojnë qindra denoncimet e opozitës për lidhjet e drejtuesve të policisë me botën e krimit.
Ai thekson se depërtimi i krimit në politikë dhe përdorimi i bandave si shtabe elektorale kanë shkaktuar një situatë ku ngjarjet përditshme shpërfaqen si copëza, duke e bërë të pamundur të dallohet ku fillon krimi dhe ku mbaron shteti. Ky reagim vë në pah shqetësimet e theksuara lidhur me lidhjet e dyshuara dhe sfidat për të ruajtur integritetin e institucioneve.
“Arrestimet e fundit të drejtuesve të lartë të policisë konfirmojnë qindra denoncimet e opozitës për lidhjet e drejtuesve të policisë me krimin, për përfshirjen e tyre në veprimtari kriminale, për promovimin e shefave të policisë në bazë të lidhjeve me krimin dhe promovimit prej krimit dhe jo mbi bazën e meritës dhe performancës në luftë me krimin!
Depërtimi i krimit në politikë dhe përdorimi i bandave si shtabe elektorale ka prodhuar këtë situatë ku përditshëm shpërfaqen copëza të ngjarjeve ku nuk kuptohet ku fillon krimi e ku mbaron shteti, apo akoma më keq koklavitjen dhe mpleksjen në një të shtetit me krimin! Si përherë kemi inkurajuar e inkurajojmë institucionet ligjzbatuese për të luftuar pa dallim krimin, depërtimin dhe lidhjet e tij në nivele të larta të organeve ligjzbatuese apo të politikës!”, ka shkruar Salianji.
