Deputeti i Partisë Demokratike, Asllan Dogjani komentoi zhvillimet e fundit në Kuvend, ku ditën e sotme buxheti për vitin 2024 kaloi vetëm me votat e mazhorancës pa diskutime, në mes të kaosit dhe tymuesve të hedhur nga deputetët opozitarë.
Gjatë intervistës në Fax News, Dogjani u shpreh se opozita sot u rrethua nga gardistë gjithandej, kurse parlamenti ngjante me një repart ushtarak. Sipas tij, opozita nuk ka rrugë tjetër dhe do të veprojë kështu pasi kjo mazhorancë i ka mohuar çdo të drejtë për Komisione Hetimore.
Sipas tij synohet të hetohen konçesionet, ndërhyrja në sistemin TIMS dhe afera e portit të Durrësit. Në momentin që mazhoranca do pranojë ngritjen e këtyre komisioneve atëherë do shihet nëse bëhen për interes të opozitës apo për të zbuluar të vërtetën.
Asllan Dogjani: “Parlamenti ngjante me një repart ushtarak, me kontrolle. Presupozohet që Kuvendi është një sallë ku qytetarët na kanë autorizuar t’i përfaqësojmë. Sot ishte si një repart ushtarak. U kontrolluan deputetët dhe deputetet me forca të gardës. E njëjta situatë ishte dhe në sallën e parlamentit. Ishin edhe disa gardist që edhe i njohim por ishin në kushte të vështira, të urdhëruar. Na ndaluan në të drejtat tona. Kemi kërkuar ngritjen e komisioneve hetimore, për të hetuar vjedhjet, ndërhyrjen në sistemin TIMS, koncesionet, portin i Durrësit. Të cilat u rrëzuan nga kjo mazhorancë nga forca e kartonave. Jemi detyruar të veprojmë në këtë mënyrë sepse nuk na ka ngelur rrugë tjetër. I kemi thënë dhe mazhorancës, miratoni Komisionet Hetimore dhe pastaj shikoni a e kemi për interes tonë apo…”
