Autoriteti Kombëtar i Ushqimit ka bllokuar një sasi prej 20 ton produkt kastravec, pasi ka rezultuar mbi normën e lejuar të përmbajtjes së pesticideve.
Bëhet me dije se pas njoftimit të ardhur nga vendi importues, AKU ka kryer verifikimet në zbatim të legjislacionit në fuqi në subjektin eksportues të këtij produkti, ku është bërë dhe bllokimi i menjëhershëm i kësaj sasie. Sipas njoftimit të AKU-së, subjektit i është lënë detyrë të marrë masat për asgjësimin e tij.
Gjithashtu njoftohet se AKU po bashkëpunon me institucionet e tjera ligjzbatuese AREB dhe ARSHVMB, ku në bazë të sistemit të gjurmueshmërisë të administruar në subjektin eksportues, të vijohet me mbikqyrjen e subjekteve/fermerëve, mbi përdorimin e pesticideve dhe respektimin e karencës së përdorimit të produktit.
