Dashamir Shehi, në studion e “Debat” nga Alba Alishani, në A2 CNN, tregoi se ku ka dështuar politika shqiptare në 30 vitet e fundit.
“Kemi 30 vjet që bëjmë politikë një grup kundër një personi apo një grupi tjetër. Erdhëm si e djathtë, duke luftuar Fatos Nanon atëherë. Ai përfundoi edhe në burg. Kishim idenë që të bënim një shtet me principe të së djathtës. E çfarë e djathte u bë? Asgjë.
Pastaj, erdhi grupi tjetër që donte të hiqte Berishën dhe donte të ndërtonte të majtën, një të majtë liberale, demokratike dhe europiane. E çfarë të majte bëri? A morën më shumë të drejta punëtorët, a u vu minimum jetik? Asgjë nuk u bë. Ky njeri dhe ky grup që është sot ka prodhuar kapitalizmin më të egër. Këtu drejtojnë 10 biznesmenë që ishin edhe në qeverinë e mëparshme. Pra, kjo ka ndodhur 3 dekada në politikën shqiptare, nuk ka pasur debat konstruktiv për të rregulluar shtetin shqiptar”, deklaroi Shehi.
“Kjo që po them unë ka nevojë për ide të reja dhe duar të pastra në radhë të parë, që të bëhet e besueshme. Sot, duart e pastra janë në kampin opozitar sepse këta të tjerët kanë 3 herë në pushtet, edhe shenjtorë të jenë, do i jenë bërë pis duart. Edhe të rinjtë janë të mirëpritur, unë jam prej atyre që çdo ide të re e quaj kontribut në demokraci. Demokracia është e drejta për të folur dhe këtë të drejtë e kanë të gjithë”, shtoi Shehi.
