Gjykata e Posaçme ka shpallur vendimin, këtë të hënë për ish-sekretaren e Ministrisë së Shëndetësisë Joana Duro.
Mësohet se Duro është dënuar me 4 vite burg, nga të cilat 1/3 ulet duke sjellë totalin në 2 vite e 8 muaj. Po ashtu raportohet se për Duron u vendos edhe një dënim plotësues, i cili nuk e lejon atë të ushtrojë për 5 vite asnjë funksion publik.
Kujtojmë se ish-sekretarja e MSH, u arrestua në qershor të këtij viti, pasi akuzohet për veprën penale “Korrupsioni pasiv”. Sipas SPAK, Duro, ka përfituar në mënyrë të parregullt vlerën monetare prej 330.000 (treqind e tridhjetë mijë) mijë lekë për të favorizuar shoqërinë “Dricons” sh.p.k, e cila në atë kohë kishte fituar fazën e parë të tenderit të shpallur nga Ministria e Shëndetësisë dhe Mbrojtjes Sociale për LOT 1,”Supervizim për rikonstruksionin e disa Qendrave Shëndetësore në Qarqet Tiranë dhe Durrës, me fond limit 805 mijë lekë.
Veç Duros, akuzohen për korrupsion edhe Laura Shteto, specialiste e Nivelit të Lartë të Agjencinë e Ofrimit të Shërbimeve Publike të Integruara; Vladimir Topi, administratori i shoqërisë “Dricons” sh.p.k dhe Silvi Sheshi, inxhiner pranë këtij operatori ekonomik.
Shteto, Topi dhe Shehi u dënuan me nga 1 vit burg dhe për shkak të gjykimit të shkurtuar, u dënuan në total me 8 muaj.
