Opozita vijon aksionin e bllokimit të jetës parlamentare edhe këtë të enjte.
Deputetë të opozitës grumbulluan karriget e Kuvendit para foltores, në përpjekje për të bllokuar seancën e parashikuar për tu zhvilluar ditën e sotme.
Pas tyre, efektivët e gardës kanë krijuar një kordon.
Në orën 10:00, kryeparlamentarja Nikolla njoftoi nisjen e seacnës plenare, ndërkohë deputetë të PD-së ndezën tymuese. Salla u përfshi nga tymi.
Në pamundësi për të ligjëruar në foltore (për shkak të bllokimit nga karriget), Nikolla u dha fjalën deputetëve nga vendi. Teksa deputetët socialistë merrnin fjalën, ata të opozitës godisnin tavolinat me duar në shenjë proteste.
Deputetët demokratë janë angazhuar në bllokimin e punimeve të Kuvendit pasi shprehen se të drejtat e tyre po shtypen nga mazhoranca. Sipas opozitës, në mënyrë antikushtetuese, PS po pengon ngritjen e komisioneve hetimore të kërkuara nga PD si dhe po tenton të ‘përcaktojë’ opozitën duke refuzuar ndryshimet në komisionin e posaçëm të reformës zgjedhore.
Në një prononcim për gazetarët para se të futej në Kuvend, kreu i PD-së Sali Berisha tha se aksioni opozitar është “pa kthim”.
“Ky është një aksion pa kthim. Një aksion që do kalojë në të gjithë stadet e veta deri në rivendosjen e Kushtetutës në parlament dhe në vend”, theksoi ai.
