Janë zbardhur detaje nga dëshmia e dhënë në Polici e edukatores së kopështit privat “Stinët” në zonën e Ali Demit në kryeqytet, Majlinda Dehima, e cila është vënë nën hetim për kryerjen e veprës penale “Keqtrajtimi i të miturve”, pas denoncimit me video ku shfaqej duke dhunuar një tre vjeçare, të cilës iu thye dhe këmba.
Burime bëjnë me dije se edukatorja Majlinda Dehima ka deklaruar se të miturën e ka goditur me vizore jo për të dëmtuar, por për ta bindur që të marrë pjesë në mësim, teksa ka shtuar se vajza e vogël nuk kishte vëmendjen dhe nuk përfshihej, ndryshe nga fëmijët e tjerë në klasë.
Ajo më tej ka pretenduar se e ka dërguar 3-vjeçaren për të fjetur gjumë dhe më pas e vogla nuk ka pasur shqetësime. Sipas saj, vajza ka fjetur për rreth 2 orë e gjysmë dhe kur është zgjuar, i ka shprehur shqetësime se ndjente dhimbje.
Sipas Majlinda Dehimas, më pas ajo e ka kuptuar se e mitura e kishte dëmtuar këmbën, teksa pretendon se vajza mund të ketë qenë dëmtuar tek krevati, pasi ka thënë se aty ka hapësira.
Edukatorja gjithashtu është shprehur se ka vënë në dijeni drejtoreshën e kopshtit privat për rastin.
Rasti i paprecedentë, që u publikua nga emisioni “Stop”, vuri në lëvizje të gjithë instancat, për të kuptuar së pari që kopshti “Stinët” ka operuar i palicensuar.
Gjithashtu, Drejtori i Përgjithshëm i Policisë së Shtetit, Muhamet Rrumbullaku firmosi dhe pezullimin nga detyra të tre efektivë të komisariatit të Policisë nr.1 në kryeqytet në lidhje me ngjarjen e rëndë
