Prej orës 18:00, në “Arenën e Demave” po zhvillohet supersfida e javës së 12-të të Kategorisë Superiore, mes Partizanit dhe Vllaznisë, ndeshje e cila deri më tani po rezulton të jetë spektakolare.
Në minutën e 20′ ka ardhur dhe goli i parë i sfidës, teksa pas një rrëmuje në zonën e shkodranëve përfiton “fantazisti” i mesfushës së “Demave”, Arinaldo Rrapaj, i cili me një goditje potente ndëshkon miqtë, duke i dhënë të tijve avantazhin.
Megjithatë avantazhi i vendasve ka zgjatur vetëm 10 minuta teksa shkodranët kanë barazuar shifrat në minutën e 30-të.
Një goditje dënimi, nga një distance prej më shumë se 25 metrash ekzekutohet në mënyrë perfekte nga ish-“bomberi” i Kombëtares, Bekim Balaj, i cili mposht portierin Qirko.
