Partia Demokratike e ka shtyrë me një orë mbledhjen e grupit parlamentar, të planifikuar për t’u mbajtur ditën e nesërme në orën 09:00.
Ky vendim vjen pas vendimit të Komisionit të Ekonomisë, i cili ka vendosur ta bëjë mbledhjen online përmes platformës “zoom”. Në njoftim nuk jepen arsyet, por siç duket mazhoranca i trembet bllokimit nga ana e opozitës për punimet në këtë komision. Gjithsesi, mbledhjet online mbahen vetëm në gjendje lufte.
Ndërkohë, kreu i grupit parlamentar të PD, Gazment Bardhi, në komunikimi me deputetët, u bën me dije se mbledhja do të mbahet në orën 10:15 në sallën e grupit pranë Kryesisë së Kuvendit dhe u kërkon që të jenë të gjithë prezent.
Ditën e hënë axhenda parlamentare është tepër e ngjeshur me mbledhje të Komisioneve, ai i Ekonomisë, Ligjeve, Shëndetësisë, Politika e Jashtme dhe Veprimtaria Prodhuese ku kryefjalë do të jetë projekt-buxheti i vitit 2024.
Deputetët e PD-së thonë se nuk do të ketë normalitet parlamentar derisa të plotësohen tre kërkesat e tyre: për ngritjen e komisioni hetimor për koncesionet në shëndetësi, për ngritjen e komisioni hetimor për ndërhyrjen në sistemin TIMS, si dhe ndryshimin e përbërjes së anëtarëve të Reformës Zgjedhore.
Njoftimi i Kryetarit të Grupit Parlamemtar të PD, Gazment Bardhi drejtuar deputetëve të opozitës:
“Mbledhja e grupit e planifikuar për në orën 09:00, shtyhet për në orën 10:15. Lutem të jemi të gjithë në orën 10:15 në sallën e grupit pranë Kryesisë së Kuvendit. Ju përshëndes!”.
Njoftimi i Komisionit të Ekonomisë:
“Në vijim të njoftimeve për zhvillimin e mbledhjes së Komisioni për Ekonominë dhe Financat për sa i përket shqyrtimit të projektligjeve të Paketës Fiskale. Ju bë me dije se mbledhja e komisionit, ditën e hënë, dat 6.11.2023, Ora 09:30, do të zhvillohet online në platformën Zoom. Link për aksesimin e mbledhjes do ju dërgohet në vijim.”
