Është identifikuar njëri prej shqiptarëve që humbën jetën tragjikisht mëngjesin e të hënës në një kantier ndërtimi në Hamburg të Gjermanisë.
Mediat raportojnë se njëri prej viktimave është shtetasi Albert Zorba, 31 vjeç, nga Elbasani. Vëllai i të ndjerit Zorba ndodhet i burgosur në Angli, ndërsa i ati i moshuar ka mbërritur në Hamburg.
Mësohet se viktima i dytë i identifikuar është një i ri nga Kukësi me inicialet R.H. Shqiptarët punonin në të zezë në kantier, pasi ishin me dokumente të rreme bullgare dhe kjo është arsyeja e paqartësisë së identiteteve të tyre nga shteti gjerman.
Besohet se numri i shqiptarëve që kanë humbur jetën në skelën që u shemb është pesë, tre shqiptarë të Shqipërisë dhe dy shqiptarë të Maqedonisë së Veriut të gjithë të regjistruar me dokumenta bullgare. Mbrëmjen e djeshme është nxjerrë nga rrënojat një tjetër trup.
Administratori shqiptar nga Kosova i firmës që kishte regjistruar shqiptarët me dokumente false është zhdukur. Ngjarja ndodhi teksa shqiptarët po punonin për ndërtimin e një pallati në zonën e HafenCity. Mendohet se ka ende viktima nën rrënoja dhe po punohet për nxjerrjen e trupave.
