Interpol ka zhvilluar një operacion për goditjen e barnave kontrabandë në 89 vende të botës përfshirë edhe Shqipërinë.
Mediat e huaja shkruajnë se operacioni që u zhvillua nga 3-10 tetor, ka çuar në 72 arrestime në mbarë botën, sekuestrimin e barnave farmaceutike potencialisht të rrezikshëm me vlerë më shumë se 7 milionë dollarë, 325 hetime të reja dhe mbylljen e më shumë se 1300 faqeve të internetit kriminale.
“Ilaçet për mosfunksionimin erektil vazhdojnë të jenë ilaçi më i kapur në nivel global, duke zënë 22 për qind të konfiskimeve gjatë operacionit. Agjentët psikoterapeutikë si antidepresantët, ilaçet kundër ankthit dhe stimuluesit ishin në vendin e dytë me 19 për qind, të ndjekur nga hormonet seksuale dhe ilaçet gastrointestinale me 12 për qind respektivisht”,- shkruan Interpol në një deklaratë zyrtare.
Ndërkohë raportohet se këto barna përfaqësojnë gjithashtu një burim të madh të ardhurash për grupet e krimit të organizuar transnacional dhe mbështesin aktivitete të tjera kriminale.
“Ilaçet e falsifikuara dhe keqpërdorimi i barnave të rregulluara është një kërcënim i rëndësishëm për sigurinë publike në mbarë botën. Operacioni Pangea XVI hoqi një sasi të madhe produktesh të paligjshme dhe potencialisht kërcënuese për jetën nga rrugët dhe çmontoi rrjetet kriminale që trafikonin mallra të tilla”, tha Jürgen Stock, Sekretari i Përgjithshëm i INTERPOL-it.
