Policia e Durrësit ka arrestuar ditën e djeshme tetë persona të përfshirë në konfliktin për çështje pronësie në Kepin e Rodonit në Durrës.
Burime bëjnë me dije se mes të arrestuarve është edhe ish-deputeti Mark Frroku. Ky i fundit ka qene i pranishëm në vendngjarje si përfaqësues i kishës katolike dhe bashkë me të janë ngritur akuza edhe ndaj disa personave të tjerë.
Disa banorë të fshatit Shetaj, konkretisht shtetasit Bajram Kaculi, Erjon Reka, Ylli Reka dhe Orgito Reka janë konfliktuar ditën e djeshme me sende të forta, me përfaqësues të kishës katolike, shtetasit N. S., Mark Frroku., Martin Lazeri dhe Pal Doda. Veç emrave të mësipërm, në pranga është vënë dhe shtetasi Antonio Lazari.
Sipas asaj që njoftoi policia konflikti ka nisur gjatë kohës kur përfaqësuesit e kishës katolike po bënin rrethimin e pronës për të cilën kanë certifikatë pronësie. Banorët e zonës nuk i kanë lejuar që të bëjnë këtë rrethim pasi edhe ata kanë një certifikatë pronësie, që pretendojnë se e kanë po për këtë pronë.
Konflikti midis këtyre shtetasve ka agravuar me përdorimin e sendeve të forta, pas konfliktit me grushte. Në vendngjarje është gjetur dhe 1 gëzhojë arme zjarri.
Konflikti mësohet se ka ndodhur mes një personi të quajtur B.Kaculi, i cili ka edhe një pronë në hyrje të Parkut dhe rojeve të Parkut të Kepit të Rodonit. Këta të fundit dyshohet se kanë përdorur edhe pistoletat, në tentativë për të larguar familjen Kaculi. Por, nga burime të redaksisë mësohet se i gjithë konflikti është për një pronë, e cila ka dy certifikata pronësie. Një nga familja Kaculi dhe një tjetër nga Kisha Francceskane. Por, në “lojë” janë futur edhe të fortët e zonës, të cilët janë kundër familjes Kaculi, pasi në pronën e tij synojnë që të shkojnë në det, për të ndërtuar edhe një mol. Pra, një skemë e pastër, ku në lojë janë futur një mori institucionesh, që nga Kadastra, Policia e Shtetit, Njësia Administrative, Bashkia e Durrësit apo edhe Inspektoriati Kombëtar i Mbrojtjes së Territorit.
Ndërkohë, redaksia e BoldNews.al mësoi se i gjithë konflikti është për një tjetër projekt madhor. Disa metra larg tokës së z. Kaculi janë ndërtuar vilat e para, për të ashtuquajturën “Cape of Rodon Resort”. Është një projekt i ngjashëm e ato që po ndërtohen në Jug, ndërsa sipas informacioneve do të ndërtohen vila individuale, dyshe apo katëshe. Disa janë ndërtuar, teksa synohet që projekti të zgjerohet.
“Shikoje pse bëhet lufta. Duan të garantojnë këtë mini port/ dalje në det (foto më sipër). Janë disa persona nga veriu që kanë ndërtuar në atë zonë dhe rojët e Parkut janë po nga veriu, të vënë disa javë më parë. Po bashkëpunojnë që të largojnë me forcë familjen Kaculi, nga fshati Shetaj. Edhe projekti që është ndërtuar ka qenë pronë e Kishës, madje në atë vend kanë qenë edhe varrezat dhe një kishë e vjetër. I prishën dhe po marrin pronat e banorëve të zonës me forcë që të bëjnë resorte” thanë banorët për redaksinë e BoldNews.al.
Nën zë, të gjithë banorët e fshatit Shetaj pohojnë se pas këtij projekti qendron një deputet. Por, asnjëri nuk pranon që të japë emra apo edhe përkatësi politike.
“Po e bëjnë me forcë. Po na marrin pronat me forcë” përfundojnë ata.
Gjak dhe armë për pronat në Kepin e Rodonit, policia vetëm mbledh gëzhojat!
