Koreografi dhe balerini i skenave ndërkombëtare, Blenard Azizaj ka bërë një rrëfim shumë special në emisionin ‘Pas Mesnate’ .
Ai ka treguar se ka ikur në Greqi përmes maleve, por herën e parë u kap nga policia dhe kur e shoqëruan në komisariat kaloi në një traumë. Ndërkohë, herën e dytë iku po nga malet, por pati fat dhe ia doli.
“Unë kam ikur si emigrant në Greqi. Herën e parë kam qene 14 vjeç kur kam ikur nga mali dhe ka qene një traumë, sepse në mes të natës atëherë na kapi policia greke duke bërtitur me armë. Edhe ishte hera e parë që unë shkoja në një qeli dhe me shokë të tjerë, jo vetëm fare. Unë ika pa lejen e prindërve, sepse sigurisht ata po ta dinin, nuk do më linin. I tregova një gënjeshtër të bardhë, le të themi. I thash, do të shkoj te halla dhe do rri andej për disa ditë. Unë jam nga një fshat i Fierit që quhet Zharzë, e njohur për naftën. Aty kam lindur dhe jetuar për 18 vjet. Është 10 minuta larg nga Fieri. Mbas ikjes së parë që ishte tentativë që më kapi policia, mbarova gjimnazi dhe fitova universitetin këtu në Tiranë për gjeologji minierash. Bëra një vit universitet në Tiranë, me pamundësi ta vazhdoja, kështu që shkova prapë në Greqi në të njëjtën mënyrë, prapë nga malet, por këtë herë nuk më kapi policia. Pata fat, isha 18-vjeç”, u shpreh Azizaj.
