Është zbardhur dëshmia e dhënë në Polici e 18-vjeçarit Armir Hasaj, i cili tentoi të vriste me armë zjarri një 16-vjeçar në Kamëz, duke e lënë të plagosur.
Burime bëjnë me dije se Armir Hasaj ka deklaruar para hetuesve se sherri me 16-vjeçarin, me të cilin ka kohë që njihej dhe ishin rritur në një lagje, ka nisur për shkak se i mituri i ka ngacmuar të dashurën.
Fillimisht, sipas tij, janë konfliktuar me njëri-tjetrin, pasi kishin lënë që të takoheshin për t’u sqaruar, por debati mes tyre ka degraduar dhe në gjaknxehtësi e sipër ka hapur bagazhin e makinës, ku mbante një armë kallashnikov dhe ka qëlluar vetëm një herë në drejtim të të miturit.
Për hetuesit mbetet akoma e paqartë se ku i riu ka arritur të siguroj armën e krimit, të cilën e mbante në makinë.
Ngjarja ka ndodhur pasditen e 18 tetorit, rreth orës 16:10, në rrugën “OSBE” në Kamëz, pas një konflikti mes tyre. Burime për mediat bëjnë me dije se autori dhe i plagosuri janë shokë në lagje me njëri-tjetrin. Ata njiheshin prej vitesh dhe më herët nuk rezulton që të kenë pasur zënka apo konflikte.
Sot policia njoftoi arrestimin e Armir Hasajt dhe bashkëpunëtorit të tij në krim, shtetasi Xh. Ç., 19 vjeç, të dy banues në Kamëz. Blutë e kryeqytetit kanë sekuestruar në cilësinë e provës materiale automjetin me të cilin dy autorët e dyshuar janë larguar nga vendi i ngjarjes.
