Prokuroria e Elbasanit ka dalë me një komunikatë zyrtare ditën e sotme për vendimin për të shpallë moskopetencën për dosjen e të penduarit të drejtësisë Artan (Marjus) Tafani, i cili zbardhi krimet e Laert Haxhiut, i cili ndodhet i arrestuar në Greqi.
Arsyeja e shpalljes së moskompetencës, sipas Prokurorisë së Elbasanit, janë konsumimi i elementëve të veprës penale “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Tashmë kjo dosje do t’i kalojë SPAK-ut, ku do të hetojë 13 të arrestuar dhe tre personat e shpallur në kërkim. Të arrestuarit nga Lushnja, Pogradeci dhe Korça akuzohen për 6 vrasje, vrasje të mbetur në tentativë, grabitje, vendosje tritoli dhe mbajtje pa lejë të armëve.
Mes dosjeve që i është bashkuar SPAK, është dhe një çështje e prokurorisë së Tiranës që flet për grabitjen e 30 mijë eurove në pikën Tele.Co në Zonën e Astirit në Tiranë. Për këtë çështje është arrestuar Enio Meçaj si bashkëpunëtor i Artan Tafanit në këtë grabitje.
Kreu i grupit është Laert Haxhiu, i cili është i dënuar me 18 vite burg për masakrën e Lushnjës në vitin 2017, ku u vranë Zamir Latifi dhe Jurgen Hoxha, por shpëtoi shënjestra e autorëve, Xhulio Shkurti, nipi i Aldo Bares, kreu i bandës së Lushnjes. Pritet ekstradimi i tij nga Greqia, teksa ditën e djeshme, Gjykata e Apelit të Janinës ka dhënë “OK”, teksa ai ka edhe të drejtën e shqyrtimit të çështjes në Gjykatën e Lartë greke.
Po ashtu, pas dëshmive të Artan (Marjus) Tafanit, Laert Haxhiu akuzohet si autor i vrasjeve të:
- Lulzim Qorrit, 12 Dhjetor 2018 në Athinë
- Fridmand Xhaferrajt, 13 Maj 2021 në Korçë
- Çajup Selimit, 1 Qershor 2021 në Tepelenë
- Dikens Halilit, 3 Tetor 2021 në Athinë
- Alban Semakut, 17 Tetor 2021 në Peqin
- Albi Bashaliut, 27 Dhjetor 2021 në Elbasan
Si dhe një sërë krimesh të tjera si shpërthime me tritol, tentativë vrasje dhe gjobvënie.
Njolftimi:
Prokuroria e Elbasanit shpall moskompetencë për “grupin e strukturuar kriminal” përgjegjës për disa ngjarje të rënda – dosja i kalon SPAK
Prokuroria pranë Gjykatës së Shkallës së Parë të Juridiksionit të Përgjithshëm Elbasan, mbi bazën e materialit hetimor të ardhur nga Drejtoria Vendore e Policisë Elbasan, ka regjistruar procedimin penal nr.1599, të vitit 2021, që bën fjalë për veprat penale të parashikuara nga nenet 78 e 25, dhe 278 të Kodit Penal.
Si rezultat i hetimit në kuadër të këtij procedimi, ka dyshime të arsyeshme se personat nën hetim, janë autorë të vrasjes së shtetasit A. S., ngjarje e ndodhur në datë 17.10.2021 në Peqin.
Gjithashtu, nga hetimet e kryera me metoda speciale të hetimit, dyshohet se keta shtetas në bashkëpunim me shtetas të tjerë janë autorë të disa ngjarjeve të rënda kriminale (vrasje, shkatërrim prone me eksploziv, vjedhje me dhunë, sigurim kushtesh dhe mjetesh për të kryer vrasje, etj.) të ndodhura në periudhën kohore 2021-2023 në disa qytete të ndryshme te vendit si Elbasan, Tiranë, Lushnje, Tepelenë, Korçë dhe Durrës, për të cilat ka procedime të regjistruara nga prokuroritë përkatëse të juriksionit të përgjithshëm, procedime që kanë kaluar për kompetence lëndore Prokurorisë së Shkallës së Parë të Juriksionit të Pergjithshëm Elbasan dhe janë bashkuar në një procedim të vetëm me Nr.1559 të vitit 2021 për veprat penale të parashikuara nga nenet 78 e 25, 78/a e 25, 78 e 22 e 25, 152 e 25, 80 e 25, 139 e 25 dhe 278 të Kodit Penal.
Duke vlerësuar se në rastin konkret janë konsumuar elementet e veprës penale të parashikuar nga neni 333/a i K.Penal “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”, parashikuar nga neni 334 të Kodit Penal, kemi çmuar të ri-vlerësohet çështja e kompetencës lëndore për këtë procedim penal.
Më datë 18.10.2023 është vendosur deklarimi i moskompetencës lëndore për hetimin e procedimit penal nr.1559 të vitit 2021 të Prokurorisë pranë Gjykatës së Shkallës së Parë Elbasan.
Kalimin e akteve për hetime të mëtejshme prokurorisë kompetente dhe konkretisht Prokurorisë së Posaçme Pranë Gjykatës së Shkallës së Parë Kundër Korrupsionit dhe Krimit të Organizuar (SPAK) Tiranë.
