Kryeministri Edi Rama, gjatë një interviste televizive këtë të enjte, mbrojti ndërtimin e kullave në Tiranë. Sipas tij, kullat sjellin zhvillim dhe paralajmëroi të tjera leje.
Ai shkoi edhe më tej kur u shpreh se turistë do të vizojnë kryeqytetin për të soditur kullat.
“Këto kulla i kanë dhënë një energji komplet tjetër qytetit. Tirana është bërë sot një qytet ku ndërtojnë arkitektët nga më të mirë të botës. Tirana nesër do të jetë destinacion turistik edhe për arkitekturën. Do vijnë njerëzit të shohin kullat në Tiranë. Ka një pjesë të turizmit që është turizëm për arkitekturën dhe këtu janë disa nga arkitektët më të mëdhenj të botës që ndërtojnë, që projektojnë”, tha Rama.
“Shikoni çfarë ka bërë Tel Avivi, që është një qytet që pak a shumë nga e kaluara ka një teksturë të ngjashme me Tiranën, dhe shikoni çfarë po ndodh në Tel Aviv me të gjitha zhvillimet e reja që po bëhen kullat e lart, etj., etj. Tirana e ka këtë potencial për t’u zhvilluar lart në një pjesë të saj që është rreth e rrotull”, shtoi ai.
