Tre shtetas janë arrestuar nga policia në Tiranë, pasi akuzohen për grabitje.
Në pranga kanë rënë, R. N., 19 vjeç, E. N., 46 vjeç dhe G. N., 43 vjeç, pasi grabitën një automjet tip “Benz” e çmontuan dhe i shitën pjesët.
Tre hajdutët u pikasën nga kamerat e sigurisë.
“Specialistët për Hetimin e Krimeve të Komisariatit të Policisë Nr. 6, në vijim të punës për goditjen e paligjshmërisë në fushën e vjedhjes së pronës dhe pasurisë, identifikimin e autorëve të vjedhjeve dhe vënien e tyre përpara përgjegjësisë ligjore, bazuar dhe në informacionet e siguruara përmes inteligjencës informative, kanë organizuar dhe finalizuar operacionin policor të koduar “Luna”.
Si rezultat i këtij operacioni u bë identifikimi, kapja dhe ndalimi i shtetasve:
– R. N., 19 vjeç, E. N., 46 vjeç dhe G. N., 43 vjeç, të tre banues në Tiranë.
Nga këqyrja e pamjeve filmike dhe veprimet e tjera hetimore ka rezultuar se këta shtetas, më datë 09.10.2023, kanë vjedhur një automjet tip “Benz”, në Yrshek. Pasi e kanë vjedhur automjetin, dyshohet se këta shtetas e kanë çmontuar atë dhe pjesët e tij i kanë shitur në pika shitjesh për pjesë të përdorura automjetesh”,- njofton Policia.
Materialet procedurale i kaluan Prokurorisë, për veprime të mëtejshme.
